Он жашар кыз «Кыргызстандын Кызыл китеби» тиркемесин иштеп чыгат - ага 4.5 миң евро бөлүнөт
5-класстын окуучусу 10 жаштагы Дарина Digi Konush долбоорунан жапайы жаныбарларды коргоо боюнча «Кыргызстандын Кызыл китеби» аталган мобилдик тиркемесин иштеп чыгуу үчүн 4.5 миң евро алат. Бул тууралуу долбоордун басма сөз кызматы билдирди.
Окуучу кыздын айтымында, тиркеме Кызыл китепке кирген жаныбарлардын сегиз түрүн камтыйт: аркар, кызыл карышкыр, ак илбирс, күрөң аюу жана башкалар.
«Тиркемени иштеп чыгууга апам жана мугалимдер жардам беришти. Дагы эки курбу кызым – Жанат жана Бегайым долбоорду жазып, сурамжылоо жүргүзүүгө жардам беришти. Алар 13 жашта», – деди Дарина.
Белгиленгендей, тиркеме эки бөлүктөн: маалыматтык жана интерактивдүү бөлүктөрдөн турат. Экинчи бөлүгүндө ак илбирс мергенчинин жебелеринен качкан мобилдик оюн камтылган, бул балдардын кошумча кызыгуусун жаратат. Мобилдик тиркеменин максаты – өсүп келе жаткан муундун экологиялык аң-сезимин жогорулатуу жана айлана-чөйрөгө аяр жана боорукер мамилени калыптандыруу. Даринанын атаандаштары жок – мындай тиркеме Кыргызстанда биринчи жолу пайда болот.
Окуучу кыз санариптик демилге сынагында грант утуп алды. Кыргызстан менен Эстониянын көз карандысыз эксперттери, ошондой эле тийиштүү ведомстволордун өкүлдөрү кирген комитеттин добуш берүүсүнүн жыйынтыгында кыргызстандык жаш кыздын долбоору 132 упай топтоп, 13 жеңүүчүнүн тизмесинде сегизинчи орунду ээледи.
Ошентип, Дарина Кыргызстандагы жана балким, анын чегинен тышкары да, стартап-конкурстардын эң жаш жеңүүчүсү болуп калды.
“DigiKonush – санариптештирүү аркылуу Кыргызстандын айыл жамааттарында ачык келечекти куруу” долбоору “Лидер” жарандык демилгелер борбору тарабынан Европа биримдигинин колдоосу менен, Эстониянын Эл аралык өнүктүрүү борбору менен өнөктөштүктө ишке ашырылууда.
