Жарым жылда КРнын ЕАЭБ өлкөлөрү менен товар жүгүртүүсү 2.5 млрд долларга жетти - 35%га өстү
КРнын ЕАЭБ өлкөлөрү менен товар жүгүртүүсү 2.5 млрд АКШ долларына жакын сумманы түздү. Бул тууралуу министрлер кабинетинин төрагасы Акылбек Жапаров Ереван шаарында (Армения Республикасы) өтүп жаткан Евразия өкмөттөр аралык кеңешинин кеңейтилген форматтагы жыйынында билдиргенин минкабдын маалымат кызматы билдирди.
Жапаров үстүбүздөгү жылдын январь-август айларында ЕАЭБде айыл чарба продукциясын өндүрүү 4.4%га өскөнүн, ошондой эле ЕАЭБге мүчө мамлекеттерге 6.6%га өсүү менен инвестициянын агылып келүүсүндө оң динамика байкалып жатканын белгиледи.
“Биринчи жарым жылдыктын жыйынтыгы боюнча Биримдиктин Кытай, Индия жана АСЕАН өлкөлөрү сыяктуу негизги өнөктөштөрү менен тышкы соодасынын көлөмү туруктуу өсүшкө ээ болууда. Алсак, алар менен сооданын көлөмү тиешелүү түрдө 31.9%, 31.7% жана 11.3%га өскөн. Учурдагы чектөөлөргө карабастан, Европа Биримдиги менен сооданын көлөмү 28.4% өскөн.
Үстүбүздөгү жылдын 9 айынын жыйынтыгы боюнча КРнын экономикасынын өнүгүү динамикасы да оң көрсөткүчкө ээ болууда. Ошентип, ИДП 2021-жылдын ушул мезгилине салыштырмалуу 7.2%га өстү.
Үстүбүздөгү жылдын январь-июль айларында КРнын ЕАЭБ өлкөлөрү менен товар жүгүртүүсү 2.5 млрд долларга жакын сумманы түздү жана өткөн жылдын ушул мезгилине салыштырмалуу 35%га өстү, ал эми экспорт 682.3 млн долларды түздү (өсүү 1.6 эсе), ал эми импорт – 1.7 млрд долларды (27.5%га өсүү) түзгөн”, – деди ал.
