Ошто таза суу көйгөйү ордунан жылган жок - биринчи жарыяланган тендер жараксыз деп табылды
Ош шаарындагы таза суу түтүктөрүн курууга экинчи жолу кайрадан тендер жарыяланды. Бул тууралуу Ош шаардык мэриясынын маалымат кызматы билдирди.
Мэриянын берген маалыматына таянсак, биринчи жолу жарыяланган тендер катышуучу компаниялар квалификациялык талаптарга жооп бербегендиктен жараксыз деп табылган.
Учурда “Данги” участкасындагы башкы суу алуучу жайды жана Ош шаарындагы таза суу түтүктөрүн курууга экинчи жолу кайрадан тендер жарыяланган.
Эскерте кетсек, ушул жылдын август айында Ош шаарынын мэри Алмаз Мамбетов “Ош шаарын суу менен камсыздоону жакшыртуу” программасынын алкагында Ош шаарынын суу алуучу курулмасын жана суу тосмосуна суу түтүгүн курууга тендер жарыяланганын билдирген болчу. Бирок жогоруда айтылгандай, биринчи тендер жараксыз деп табылган.
Бул долбоорго Азия өнүктүрүү банкы (АӨБ) тарабынан 3 млн доллар каралган. Бирок экинчи тендер качан жыйынтыкталат, жыйынтыкталса, качан башталат, башталса долбоор качан аягына чыгат, аягына чыкса, Ош эли качан таза суу менен камсыз болот, азырынча мэрия так маалымат бере элек.
Белгилей кетсек, Ош шаарынын тургундары ичүүчү сууну Ак-Буура дарыясынан алгандыктан, суу жамгырдан кийин булганса сааттап, айрым учурда эки-үч күнгө чейин шаар эли таза суусуз калат.
Эскерте кетсек, 19-майда Ош шаарынын активисттери ар жааган жамгырдан улам токтоп калган таза суунун жоктугуна нааразы болуп, акцияга чыгышкан.
Кечээ, 31-октябрда Жогорку Кеңештин Бюджет, экономикалык жана фискалдык саясат боюнча комитетинин депутаттары көчмө жыйындын алкагында Ош шаарындагы Ак-Буура дарыясына барып, ал жердеги көйгөйлүү маселелер менен жеринде таанышышты.
Ош шаарынын мэри Алмаз Мамбетов да нөшөрлөп жааган жамгырда калаа тургундарын таза суу менен үзгүлтүксүз камсыз кылуу маселесин толук чечүү үчүн адистер заманбап сууну тазалоочу мембраналык системаны орнотууну сунуштап жатканын баса белгиледи.
Анда Папан суу сактагычындагы сел учурунда булганган сууну тазалай турган ультра фильтрация технологиясы иштейт. Өз кезегинде депутаттар бул долбоорлорду колдоорун айтып, бул идеяларды эл аралык жана бейөкмөт уюмдар арасында сунуштоо зарылдыгын жөн гана белгилеп коюшту.
