«Астыбыздагы эң кыйын реформа - Соцфондду пенсиялык фонд кылып өзүнчө бөлүү» - Акылбек Жапаров
Министрлер кабинетинин жетекчиси Акылбек Жапаров бүгүн, 4-ноябрда ушул сааттарда “Ата-Журт Кыргызстан” парламенттик фракциясынын жана “Мекенчил” депутаттык тобунун кошмо жыйынында пенсия жаатындагы жүргүзүлчү реформалар тууралуу минкабдын пландарын айтты.
Анын айтымында, бүгүнкү күндө Соцфонддун өзүнүн кирешеси 54.9 млрд сомду түзсө, Соцфондго тапкан кирешесинен 75% көлөмүндөгү каражат же кошумча 41.3 млрд сом трансферт катары республикаттык бюджеттен берилет.
“Негизи эле биз пенсиялык фондду түзүп жатканда, ал бюджеттен кетет, ар бир киши өзүнүн пенсиясын өзү чогултат дегенбиз. Биз тилекке каршы, 20-30 жылдан бери реформа жасабай, пенсиялык фонд толугу менен бюджетке келип отуруп калды.
Астыбыздагы эң кыйын реформалар – Соцфондду пенсиялык фонд кылып өзүнчө жана социалдык төлөмдөрдү да өзүнчө бөлүү. Астыбызда тоскоолдуктардын баары турат. Жакында реформалар боюнча бир топ мыйзамдарды алып келип беребиз”, – деди Жапаров.
Ошондой эле ал 1-сентябрга карата 733 миң 380 адам пенсия алып жатканын, быйыл пенсиянын базалык бөлүгү 1780 сомдон 3170 сомго көтөрүлгөнүн, камсыздандыруу бөлүгү 15%га өскөнүн кошумчалады.
