«Эки өлкөнүн кызыкчылыгына жооп берет» - Садыр Жапаров Кемпир-Абад суу сактагычы боюнча келишимге комментарий берди
Президент Садыр Жапаров кечээ, 3-ноябрда, өлкөгө расмий сапар менен келген Өзбекстан Республикасынын Тышкы иштер министри Владимир Норовду кабыл алды. Бул тууралуу өлкө башчынын маалымат кызматы билдирди.
Маалыматта мамлекет башчысынын кыргыз-өзбек мамилелери достук, ынак коңшулук жана стратегиялык өнөктөштүк маанайында динамикалуу өнүгүп жатканын белгилеп, кыргыз тараптын мындан ары да эки өлкөнүн ортосундагы жалпы тарыхый мураска, маданиятка, тилге, руханий салттар жана баалуулуктарга негизделген кызматташтыкты кеңейтүү жана тереңдетүү ниетин билдиргени айтылат.
“Жолугушууда Кыргызстан менен Өзбекстандын ортосундагы мамлекеттик чек ара боюнча келишим эки өлкөнүн кызыкчылыгына жооп берери белгиленди”, – деп айтылат билдирүүдө.
Эскерте кетсек, КР Тышкы иштер министри Жээнбек Кулубаев Владимир Норов менен бирге КР менен Өзбекстандын ортосундагы кыргыз-өзбек мамлекеттик чек арасынын айрым участоктору жөнүндө келишимге кол коюшкан.
“КРнын министрлер кабинети менен Өзбекстан Республикасынын өкмөтүнүн ортосундагы Кемпир-Абад суу сактагычынын суу ресурстарын биргелешип башкаруу жөнүндө макулдашууга, КРнын Айыл чарба министрлигине караштуу Суу ресурстары кызматы менен Өзбекстандын Суу чарба министрлигинин ортосундагы суу чарба маселелери боюнча кызматташуу жөнүндө макулдашууга кол коюшту”, – деп айтылат маалыматта.
