Мамлекетке 10 млн сом төккөн чет өлкөлүк жаранга Кыргызстанда жашоого уруксат берилет
Министрлер кабинетинин кезектеги жыйынында КРнын экономикасына салым кошкон чет өлкөлүк жарандарга жашап турууга уруксат берүү системасын жөнөкөйлөштүрүү чечими жактырылды. Бул тууралуу минкабдын маалымат кызматы билдирди.
Бул чечим аркылуу КРнын экономикасына 10 млн сомдон ашык салым кошкон чет өлкөлүк жарандар үчүн убактылуу жашоого уруксаты боюнча материалдарды кароо мөөнөтү кыскартылат.
Ошол эле учурда КРнын экономикасына 10 млн сомдон ашык инвестиция салган чет өлкөлүк жаранга (КР менен чектеш өлкөлөрдүн жарандарынан тышкары) жашоого уруксат өтүнмө берилгенге чейин 6 айдан кем эмес мөөнөткө милдеттүү түрдө жашоо талабысыз уруксат берилет.
Белгилей кетсек, “Тышкы миграция жөнүндө” КРнын мыйзамына ылайык, убактылуу жашоого уруксат КРга 6 айдан ашык мөөнөткө келген КРда мыйзамдуу жашоо булагына ээ чет өлкөлүк жаранга, же жарандыгы жок адамга берилиши мүмкүн:
- ишке уруксаты менен бирге эмгек келишими боюнча иштөөгө
- окуу жайдын өтүнүч каты боюнча окуу жайда окууга;
- инвестицияларды илгерилетүү боюнча ыйгарым укуктуу мамлекеттик орган тарабынан берилген өтүнүч каттын негизинде Кыргыз Республикасынын аймагында инвестициялык ишти жүзөгө ашыруу үчүн.
