Эл аралык валюта фондунун миссиясы Кыргызстанда ишин баштады
Эл аралык валюта фондунун миссиясы (ЭВФ) Кыргызстанда ишин баштады. Бул тууралуу Улуттук банктын маалымат кызматы билдирди.
Эл аралык Валюта Фондунун Николоз Гигинеишвили башында турган миссиясы 9-ноябрдан 22-ноябрга чейин КРда расмий иш сапар менен болот.
ЭВФ миссиясынын иш сапарынын максаты – ЭВФ макулдашуусунун IV статьясына ылайык, КР үчүн консультацияларды өткөрүү болуп саналат.
Иш сапардын жүрүшүндө КР министрлер кабинетинин, КР Улуттук банкынын жана башка уюмдардын өкүлдөрү менен жолугушуулар өткөрүлөт.
“Визиттин биринчи күнүндө Улуттук банктын төрагасы Кубанычбек Боконтаев ЭВФ командасы менен жолугушуусун өткөрдү. Анын жүрүшүндө тараптар өлкөдөгү макроэкономикалык абалды, тышкы жана банк секторун, ошондой эле тиешелүү саясат чараларын талкуулашты”, – деп айтылат башкы банктын билдирүүсүндө.
