Кыргызстандын эмгек рыногунда кандай негизги үч көйгөй бар?
Өз маалыматтарынын негизинде жумуш издөө жана жалдоо боюнча HeadHunter Кыргызстан онлайн-платформасы эмгек рыногундагы үч негизги көйгөйдү аныктады.
Талапкерлердин арасында талап кылынган квалификациянын жоктугу
Учурда эмгек рыногунда квалификациялуу адистердин кескин жетишсиздиги байкалууда.
Биринчи кезекте орто же орто атайын билими бар квалификациялуу жумушчулар жана жогорку техникалык билими бар квалификациялуу адистер жетишпейт.
Көп учурда бош орундар боюнча талап кылынган жөндөмү жок адистер кайрылышат. Бул интервью этабында же ишке киргенде ачыкка чыгат. Бул, өз кезегинде, аткарылган жумуштун сапатына таасирин тийгизип, кийинчерээк айдалууга алып келиши мүмкүн.
Болгондо да көбүнчө жетекчилик кызматтарга талапкерлер – уюм жетекчиси (башкы директор, башкаруучу директор, филиалдын директору, компаниянын президенти) же анын орун басары болом дегендердин квалификациясы жетишсиз экени белгиленет.
Талапкерлер күткөн эмгек акысы компания сунуш кыла алган айлыкка дал келбейт
Талапкерлердин ойлогон суммасы вакансиялардагы сунуштардан бир жарым эсе жогору болуп чыккан учурлар бар.
“Биз талапкерлерге кандай эмгек акысын кааларын жазуудан мурда аларды рынок менен салыштырып, өз компетенцияларына кылдаттык менен баа берүүнү сунуштайбыз”, – дейт компания.
Ал эми жумуш берүүчүлөргө болсо, потенциалдуу кызматкерлер үчүн жагымдуу көрүнүү үчүн жыл сайын айлык акы боюнча изилдөө жүргүзүп туруу сунушталат.
Бардык ишкердик активдүүлүктүн Бишкекте топтолушу
Учурда бардык бош орундардын 80%дан ашыгы Бишкек шаарында топтолгон. Анткени баары шаарга көчүп, ири жана орто бизнестин башкы кеңселери негизинен борбордо жайгашкан. Бул өз кезегинде өлкөдөгү ички миграцияны күчөтөт.
Нeadhunter.kg-де жумуш издөөчүлөрүнүн 81%ы Бишкектен иш издешет. Региондорду өнүктүрүү боюнча чаралар комплекстүү кабыл алынбаса, аймактык диспропорциялар көйгөйү дагы курчушу мүмкүн.
