«Түтүн көйгөйү табигый көрүнүш эмес, бул бийликтин конкреттүү саясаты» - Бермет Борубаева
«Түтүн көйгөйү табигый көрүнүш эмес, бул бийликтин конкреттүү саясаты, ал КР Конституциясына ылайык жарандарды таза аба жана экология менен камсыз кылууга тийиш», – деп #BishkekSmog демилгесинин активисти Бермет Борубаева 2-ноябрда Economist.kg уюштурган “Бишкек түтүн каптаган дагы бир кышка даярбы” деген темада тегерек столдо оюн айтты.
«Мен кечээ таштанды полигонуна барып келдим. Ал жерге текстиль калдыктарын камаздар тонналап төгүп жатышат. Анын баары синтетика, күйгөндө ачуу кара түтүн менен тутанып, уулуу заттарды бөлүп чыгарат. Тигүү өндүрүшүнүн калдыктары такыр башка жол менен жок кылынышы керек, муну мамлекет көзөмөлгө алышы керек», – деди Борубаева.
Активист ошондой эле жерди пайдалануу маселеси курч маселе экенин белгиледи.
«Мэрия курулушка таптакыр арналбаган жер тилкелерине үй курууга уруксат берип жатат. Учурдагы жаңы курулган үйлөр каптаган жерлер мурда айыл чарба максаттарына арналган жайыт болчу. Бирок бийлик көз жумуп, жерлерди өзгөртүүнү улантып жатат», – деп кошумчалады ал.
Сөзүнүн аягында Борубаева ошондой эле Бишкекти көптөгөн уулуу өндүрүштөр жана заводдор курчаганын, алар айлана-чөйрөнү тез булгап жатканын баса белгиледи.
