2023-жылы ГЭС курууга, ипотекага, туризмге жана башка долбоорлорго 17 млрд сомдон ашык каражат бөлүнөт
Келерки жылы ири экономикалык долбоорлорду каржылоого, анын ичинде ГЭС курууга, туризмди өнүктүрүүгө жана жеңилдетилген ипотекалык кредиттерди берүүгө республикалык бюджеттен 17 млрд сомдон ашык каражат бөлүнөт. Бул тууралуу Финансы министрлигинин басма сөз кызматы билдирди.
Каражаттын эң чоң көлөмү энергетика тармагын капиталдаштырууга багытталат. Келерки жылы бул максаттарга 10.8 млрд сом бөлүнөт. Жакынкы эки жылда энергетика тармагына мындан да көп каражат салуу пландаштырылууда: 2024-жылы 55.8 млрд сом жана 2025-жылы 57.1 млрд сом.
2023-жылы Камбар-Ата ГЭС-1дин курулушу уланат. Гидроэлектростанциянын курулушуна бюджеттен 816.7 млн сом бөлүнөт.
Баткен облусун өнүктүрүүгө Финмин 500 млн сом багыттайт.
Ошондой эле эки мамлекеттик банктын (“РСК Банк” жана “Айыл Банк”) уставдык капиталын 3 млрд сомго көбөйтүү пландалууда. Банктардын ар бирине бюджеттен 1.5 млрд сомдон бөлүнөт.
Келерки жылы ипотекалык насыялоону улантууга (каражатты “Мамлекеттик ипотекалык компания” алат) жана туризм тармагын өнүктүрүүгө 1 млрд сомдон бөлүнөт.
