Бишкектин жанында Борбор Азиядагы эң чоң эс алуу жайларынын бири курулат
Бишкектен алыс эмес жерде Орто Азиядагы эң чоң эс алуу жайларынын (резорт) бири курулат. Бул тууралуу бүгүн, 23-ноябрда, маалымат жыйынында Туризмди өнүктүрүү фондунун президенти Елена Калашникова билдирди.
Анын айтымында, фонд буга чейин министрлер кабинетинен макулдук алып, Кыргызстанда эки абдан чоң долбоорду ишке ашыра баштаган. Алардын бири Бишкектин жанындагы эл аралык класстагы эс алуу зонасы.
“Комплексти азырынча Оруу-Сай деп эле атап жатабыз. Ал 15 км асма жолу жана 50 километрден узак лыжа трассалары бар дүйнөлүк деңгээлдеги курорт болот. Ал кышкы жана жайкы спорт менен машыкса боло турган эс алуу жайы болот. Ал жыл бою иштейт. Ал жерде турак жайлар, тамактануучу жайлар, бассейндер, сейилдөө, ат минүү, зиплайндар жана башкалар болот. Бул Борбор Азиядагы эң ири долбоорлордун бири, келечектин долбоору”, – деди Калашникова.
Экинчи ири долбоор катары ал Ысык-Көлдүн түштүк жээгинде курулуучу эл аралык спорт комплексин белгиледи. Анын айтымында, бул мелдештерди өткөрүү үчүн эмес, машыгуу үчүн комплекс болот.
«Ал борбордо эл аралык стандарттарга ылайык курулган стадиондор, бассейндер жана машыгуу залдары болот. Трибуналар болбойт. Бирок комплекс туристтик комплекс менен айкалышат. Анын аркасы менен туризм тармагынын эсебинен спортубузду өнүктүрүп, спортчуларга жакшы шарттарды түзө алабыз деп үмүттөнөм», – деп фонддун жетекчиси сөзүн жыйынтыктады .
