Мигранттар акыркы он жылда Кыргызстанга 23 млрд доллар алып келген
Эмгек мигранттары акыркы он жылда Кыргызстанга дээрлик 23 млрд доллар жөнөткөн. Чет өлкөгө иштегени кеткен кыргызстандыктардан түшкөн каражат Кыргызстанга келген түз инвестициялардан 2.5 эсеге ашты.
Мындай маалыматты ЖК төрагасына караштуу Миграция боюнча кеңештин жыйынында кеңештин катчылыгынын жетекчиси Медер Рахман билдирди.
Статистикалык маалыматтарга ылайык, акыркы 10 жылда Кыргызстанга түз инвестициянын көлөмү 8.75 млрд долларды, ал эми мекендештерден түшкөн кирешенин көлөмү 22.9 млрд долларды түздү, деп белгиледи Рахман.
“Мигранттар өз үй-бүлөсүнүн гана эмес, жалпы өлкөбүздүн өнүгүшүнө чоң салым кошууда. Ошондуктан, эмгек мигранттарынын көйгөйлөрүн чечүүгө ар тараптуу колдоо көрсөтүп, жардам берүү зарыл”, – деди Жогорку Кеңештин төрагасынын орун басары Жамиля Исаева.
Бүгүнкү күндө 150дөн ашык кыргыз диаспоралары башка өлкөлөрдө ийгиликтүү иштеп жатышат. Эң чоңу Россияда.
Миграция маселелерин талкуулоодо Жогорку Кеңештин депутаттары эмгек мигранттары туш болгон бир катар көйгөйлөрдү айтып, тиешелүү министрликтерди биргелешип иштөөгө чакырды. Ал эми депутат Надира Нарматова миграция маселеси боюнча өзүнчө министрлик түзүү зарылдыгын белгиледи.
