Кумтөрдө калдык сактагычтагы калдыктардан алтын өндүргөнү жатышат - азыр өнөктөштөр изделүүдө
“Кумтөр Голд Компани” алтын өндүрүү үчүн кендин калдык сактагычтагы калдыктарын кайра иштетүү боюнча биргелешкен долбоор боюнча тендер жарыялады. “КГК”нын өнөктөштөрү бардык документтерди даярдап, долбоорду мамлекеттик органдар менен макулдашып, кайра иштетүү комплексин куруп, ишке киргизиши керек.
“Кумтөр” кениндеги алтын бөлүп чыгаруучу фабриканын калдыктарын кайра иштетүү боюнча долбоорду ишке киргизүү тууралуу маалымат компаниянын сайтында жарыяланды.
Сынактын шарттарына ылайык, алтын өндүрүүчү компаниянын өнөктөштөрү консультанттарды таап, калдыктарды кайра иштетүүнүн оптималдуу технологиясын издеп таап же иштеп чыгып, техникалык-экономикалык негиздемени жана башка документтерди иштеп чыгып, ошондой эле бардык зарыл экспертизаларды жүргүзүүгө жана долбоорду мамлекеттик органдар менен макулдашууга тийиш. Андан кийин калдыктарды кайра иштетүүчү комплексти куруп, ишке киргизиши керек.
“КГК” билдирүүсү боюнча, заявкалар быйылкы жылдын 25-декабрына чейин (Бишкек убактысы боюнча саат 24:00гө чейин) кабыл алынат.
