Кыргызстандык аудиторлор ЕАЭБдин ичинде иштөөгө мүмкүнчүлүк алышат
Бүгүн, 12-декабрда Эл аралык иштер, коргоо, коопсуздук жана миграция боюнча комитетинин жыйынында ЕАЭБдин алкагында аудитордук ишти жүзөгө ашыруу жөнүндө макулдашууну ратификациялоо тууралуу мыйзамдын долбоору экинчи окууда каралды.
Жыйында баяндама жасаган Экономика министрлигине караштуу Финансы рыногун жөнгө салуу жана көзөмөлдөө мамлекеттик кызматынын төрагасы Улан Сарбановдун айтымында, Кыргызстанда 138 аудитордук уюм, 39 жеке жана 507 аудитор бар жана алар чет өлкөлүк аудитордук компаниялар менен атаандашууга жөндөмдүү.
Комитетте каралган мыйзам Кыргызстандагы аудиторлордун ЕАЭБге мүчө өлкөлөрдүн ичинде ишмердүүлүгүн алпарууга жана сырттан келген аудиторлордун КРда иштөөсүнө жол берет.
Мыйзамда төмөнкү маселелер камтылган:
- Аудитордук ишти жүзөгө ашырууга жол берүү
- аудитордук жеке уюмдардын жана аудиттердин улуттук реестрин жүргүзүү
- аудиттик иштин стандарттары
- аудитордук уюмдардын көз карандысыздыгы
- аудиттердин кесиптик этикасы
- аудитордук сырлардын институту
- ички жана тышкы көзөмөл.
Комитетте депутаттар сырттан келген аудиторлор Кыргызстандагы жумушчу орундарын талашпайбы деген чочулоолорун билдиришти. Ал эми Сарбанов башка өлкөдөн келген аудиторлор КРда үч этаптуу экзаменден өтүшү керектигин, чочулоого негиз жок экенин айтты.
