Акылбек Жапаров Чүй облусундагы өндүрүш ишканаларын кыдырды
Министрлер кабинетинин төрагасы Акылбек Жапаров Чүй облусуна болгон жумуш сапарынын алкагында Сокулук районунда муниципалдык жаңы мал базарды куруу долбоору менен таанышты. Бул тууралуу минкаб маалымат кызматы билдирди.
Долбоорго ылайык, жалпы аянты 8 гектарды ээлеген мал базарынын ичине санитардык жана ветеринардык өтмөк кирет, малдарды түшүрүү жана жүктөө үчүн эстакада, 700 унаа үчүн унаа токтотуучу жай, ошондой эле 700гө жакын бодо мал жана мындан тышкары майда малдар батат.
Андан ары Жапаров Сокулук районундагы «Тянь-Шань Керамик» кафель чыгаруучу заводуна барды. Ишкана учурда өзүнүн продукциясын Россияга жана Казакстанга экспорттойт жана мында 350дөн ашуун адам эмгектенет.
Жумуш сапарынын соңунда Сокулук районунун Военно-Антоновка айылындагы өнөр жай аймагында болгон Акылбек Жапаров, өнөр жай комплексин куруу долбоору менен таанышты.
