Казакстан былтыр дрондук чабуулдардан 480 миң тонна мунай жоготкон
Казакстандын Энергетика министрлиги Кара деңизде казак мунайын ташыган эки кеме кабылган чабуул тууралуу билдирди.
Министрликтин билдиришинче, "КазМунайГаз" жалдаган Мальтанын желеги астында сүзгөн "Матильда" танкери учкучсуз учактын соккусуна туш болгон. Жарылуудан кийин өрт тутанбай, экипаж мүчөлөрү арасында жабыркагандар болгон эмес.
Ал эми Либериянын желеги менен сүзгөн Delta Harmony танкери мунайды жүктөп алууну күтүп турганда дрон тийген. Чабуулду ким уюштурганы азырынча белгисиз. Украина да, Орусия да бул окуя боюнча расмий билдирүү жасай элек.
Узундугу 1500 чакырымга жеткен Каспий куур консорциуму(ККК) аркылуу Европага ташылган мунайдын 80%ы Казакстанда өндүрүлөт. Былтыр консорциумдун объектилерине бир нече жолу чабуул жасалып, куурдун иши тоскоолдуктарга кабылган.
Казакстан ККК объектилерине жасалган чабуулдардын айынан 480 миң тонна мунай жоготконун былтыр 11-декабрда өлкөнүн энергетика министри Ерлан Аккенженов билдирген. Анын айтымында, Казакстан КККдан баш тартпайт, анткени учурда бул багытка реалдуу атаандаш жок.
