ЖК Төрагасы БУУнун Кыргызстандагы туруктуу координаторун кабыл алды
Жогорку Кеңештин Төрагасы Нурланбек Тургунбек уулу Бириккен Улуттар уюмунун Кыргызстандагы туруктуу координатору Антье Гравени кабыл алды. Бул тууралуу Жогорку Кеңештин басма сөз кызматынан билдиришти.
Жолугушууда Кыргызстан менен БУУнун ортосундагы кызматташтыкты өнүктүрүү, биргелешкен долбоорлорду ишке ашыруу жана алдыдагы пландар талкууланды. Төрага Кыргызстан БУУ менен бардык багыттарда жигердүү иш алып барып жатканын белгилеп, парламент да өнөктөштүктү тереңдетүүгө даяр экенин айтты.
Ошондой эле туруктуу өнүгүү максаттарынын алкагында экономиканын өсүшү, ички дүң продукциянын жогорулашы жана 2030-жылга чейинки пландар тууралуу сөз болду. Төраганын айтымында, бул багытта мамлекет башчысы тарабынан коюлган тапшырмаларды аткарууда парламент активдүү роль ойнойт.
Өз кезегинде Антье Граве Нурланбек Тургунбек уулун Жогорку Кеңештин Төрагасы болуп шайланышы менен куттуктап, БУУ Кыргыз парламенти менен тыгыз кызматташууга кызыкдар экенин билдирди. Ал ошондой эле гендердик теңчилик, аялдардын жана балдардын укуктарын коргоо багытындагы иштерге жогору баа берди.
Жолугушууда гендердик теңчилик маселеси да көтөрүлүп, парламенттеги аял депутаттар үчүн 30%дык квота эл аралык практикада сейрек кездешкен ийгиликтүү кадам экени белгиленди.
