Бирөөнүн электрондук капчыгынан 2 млн сом чыгарып кеткен жаран кармалды

Чүй облусунда ири өлчөмдөгү алдамчылыкка шектелген жаран кармалганын облустук ички иштер башкармалыгынын басма сөз кызматы билдирди.

Маалыматка ылайык, 2026-жылдын 5-февралында Ысык-Ата РИИБине 1981-жылы туулган К.А. аттуу жаран арыз менен кайрылган.

Анын айтымында, ошол эле күнү ага WhatsApp тиркемеси аркылуу белгисиз адамдар чалып, төрт орундуу кодду айтып берүүнү суранышкан. Андан кийин анын банктардын бириндеги электрондук капчыгынан 1 999 006 сом акча каражаты мыйзамсыз түрдө чыгарылып кеткен.

Бул факты боюнча Кылмыш-жаза кодексинин 209-беренеси ("Алдамчылык") менен кылмыш иши козголгон.

Ыкчам-издөө иш-чараларынын жүрүшүндө 1984-жылы туулган Т.Э. аттуу жаран аныкталган. Ал Telegram мессенжери аркылуу жарандардан банк карталарын сатып алып, аларды криптовалюта биржасында иш жүргүзүү үчүн колдонорун айткан.

Тергөөдө аныкталгандай, уурдалган акча кармалган жаран үчүнчү жактардан сатып алган банк картасына которулган. Ал карта башка адамдын атына катталып, акчаны нак акчага айландыруу жана андан ары которуу үчүн мыйзамсыз максатта пайдаланылган.

Кылмыш-процессуалдык кодексинин 96-беренесине ылайык, Т.Э. кармалып, убактылуу кармоочу жайга киргизилди.