Маданият министрлиги аймактык гезиттер үчүн мамлекеттик буйрутмаларды киргизет
Маданият, маалымат, спорт жана жаштар саясаты министрлиги аймактык гезиттерди колдоо үчүн мамлекеттик социалдык буйрутма киргизүүнү пландап жатканын парламенттик комитеттин жыйынында министрдин орун басары Марат Тагаев билдирди.
Депутат Салтанат Абдылдаева өзүн-өзү каржылоого өткөн гезиттер оор абалга туш болгонун айтты. Анын сөзүнө караганда, ага аймактык редакциялардын кызматкерлеринен көп кайрылуулар түшүп жатат, айрымдарынын айлыгы болгону 5 миң сомдун тегерегинде.
Абдылдаева жергиликтүү ЖМКлардын абалына мониторинг жүргүзүп, аймактардагы кызматкерлердин иштөө жана жашоо шарттары менен таанышуу керектигин сунуштады.
Марат Тагаевдин айтымында, эки жыл мурун атайын изилдөөнүн негизинде жергиликтүү гезиттер чарбалык каржылоого өткөрүлгөн. Бирок азыркы абалды эске алып, министрлик мамлекеттик социалдык буйрутма механизмин киргизген.
"Эгер бул гезиттерде жакшы долбоорлор болсо, биз аларды мамлекеттик социалдык буйрутма аркылуу колдоого даярбыз",-дейт ал.
Мындан тышкары, ал "Кыргыз Туусу" маалыматтык-басма үйү" аттуу мамлекеттик мекеме түзүлгөнүн эске салды. Бул мекеме төмөнкү басылмаларды бириктирүү аркылуу түзүлгөн:
- "Кыргыз Туусу" басма үйү
- "Слово Кыргызстана" басма үйү
- "Байчечекей" журналы
- "Ала-Тоо" журналы
Чиновниктин айтымында, бул бирикменин айлык акысы жана бардык чыгымдары толугу менен мамлекет тарабынан каржыланат.
Марат Тагаев ошондой эле апрель айында маданият тармагындагы кызматкерлердин айлыгы жогорулары пландалып жатканын билдирди. Ошондон кийин бул мекемеде иштеген журналисттердин айлыгы да көбөйүшү күтүлүүдө.
Эске салсак, Кыргыз Республикасынын Министрлер Кабинети 2024-жылы 12 облустук гезиттин редакциясын чарбалык эсепке өткөргөн.
