Соң-Көлдө жапайы канаттууларды байкоочу курулма орнотулду
Нарын облусундагы Каратал-Жапырык мамлекеттик жаратылыш коругунун Соң-Көл участкасында канаттууларды байкоого ылайыкташкан атайын кароо курулмасы орнотулду. Бул тууралуу Жаратылыш ресурстары министрлиги билдирди.
Маалымдалгандай, курулма "Соң-Көл көлүнүн биологиялык ар түрдүүлүгүн сактоо жана жаратылыш ресурстарын туруктуу башкаруу" долбоорунун алкагында Батай-Арал аймагында орнотулган.
Бийиктиги 7 метр болгон темир конструкция жапайы канаттууларга жана алардын жашоо чөйрөсүнө зыян келтирбестен мониторинг жүргүзүүгө мүмкүндүк берет. Атайын дүрбү аркылуу эс алуучулар да канаттууларды табигый чөйрөсүндө байкоого шарт түзүлгөн.
Соң-Көл - Борбордук Азиядагы маанилүү суу-саздак аймактардын бири. Көл өрдөктөр, мойноктор, чулдуктар жана башка суу жээгинде жашаган жапайы канаттуулардын маанилүү жашоо чөйрөсү болуп саналат.
