Азия оюндары: Мээрим Жуманазарова менен Асан Жанышов жарым финалга чыкты
Бүгүн Азия оюндарында күрөш боюнча мелдештер уланууда. Кыргызстандын курамынан Мээрим Жуманазарова менен Асан Жанышов чейрек финалда атаандаштарын жеңип, жарым финалга жолдомо алышты. Бул тууралуу Дене тарбия жана спорт мамлекеттик агенттигинен кабарлашты.
Билдирүүгө караганда, кыз-келиндер күрөшүнүн 68 кг чейинки салмак категориясынын чейрек финалында Кыргызстандын өкүлү Мээрим Жуманазарова Өзбекстандын спортчусу Фируза Эсенбаева менен беттешти. Мекендешибиз кармашта толук үстөмдүк көрсөтүп, атаандашын 8:0 эсебинде жеңди. Жуманазарова ушуну менен мелдештин жарым финалына чыкты.
Ал эми эркектер арасындагы 87 кг чейинки салмак категориясынын чейрек финалында Асан Жанышов Өзбекстандын өкүлү Жалгасбай Бердимуратов менен күч сынашты. Жанышов атаандашына бир да упай бербей, 4:0 эсебинде жеңишке жетип, жарым финалга жолдомо алды.
Мындан сырткары, грек-рим күрөшүндө 130 кг чейинки салмак категориясында Кыргызстандын балбаны Мурат Ботоев чейрек финалда Ирандын өкүлү Амин Мирзазаде менен беттешип, кармаштын жыйынтыгында ирандык балбан 7:0 эсебинде жеңишке жетти. Муну менен Ботоев мелдештин кийинки баскычына өтө алган жок.
