Азамат Карабаев: Жасалма интеллект менен кошо жаңы киберкоркунучтар пайда болууда
Кыргызстандын банк сектору киберкоопсуздук жаатында жетиштүү деңгээлде даяр жана бүгүнкү күндө каржы системасын коргоо боюнча талаптарга жооп берет. Бул тууралуу BIFF 2026 Бишкек эл аралык каржы форумунун алкагында Улуттук банктын Киберкоопсуздук жана маалыматтык коргоо башкармалыгынын башчысы Азамат Карабаев "Ишкер Медиа" сайтына билдирди.
Анын айтымында, өлкөдөгү коммерциялык банктар Улуттук банк тарабынан коюлган киберкоопсуздук талаптарын аткарып келишет. Мындан тышкары алардын даярдык деңгээли эл аралык жана көз карандысыз аудиттер аркылуу дагы текшерилип турат.
"Азыр Кыргызстандагы банк секторунун киберкоопсуздук боюнча деңгээли жогору деп эсептейм. Коммерциялык банктар Улуттук банктын талаптарына жооп берет жана алардын деңгээли аудиттер менен дагы тастыкталат", — деди Карабаев.
Ошол эле учурда адис финансылык сектор үчүн эң олуттуу коркунучтардын бири катары маалыматтардын чыгып кетүүсүн атады. Анын белгилешинче, санариптик технологиялардын өнүгүшү менен маалыматтык коопсуздук маселеси дагы өзгөчө мааниге ээ болууда.
Карабаев ошондой эле жасалма интеллекттин киберкоопсуздуктагы ролуна токтолду. Анын айтымында, бул технологиялар экономиканын жана финансылык сектордун өнүгүшүнө чоң мүмкүнчүлүктөрдү түзгөнү менен, жаңы коркунучтарды дагы пайда кылууда.
"Жасалма интеллекттин пайдасы абдан чоң. Бирок ошол эле учурда ал киберкоркунучтарды дагы жаратууда. Мисалы, дипфейк технологиялары, ошондой эле киберкылмышкерлер колдонгон ар кандай инструменттер жасалма интеллекттин жардамы менен өнүгүп жатат. Ал киберчабуулдарды уюштурууда дагы колдонулууда", — деди ал.
Эксперттин пикиринде, киберкоопсуздук жаатындагы эң чоң маселелердин бири технология менен адам факторунун ортосундагы тең салмактуулукту сактоо болуп саналат. Анткени эң заманбап системалар дагы аларды башкарган адистердин билимине жана тажрыйбасына көз каранды.
"Технология канчалык өнүккөн болсо дагы аны адам башкарат. Эгер аны башкарган адистердин компетенциясы жетишсиз болсо, ар кандай коркунучтар жаралышы мүмкүн. Ошондуктан киберкоопсуздукта адамдык капитал менен технологиялык өнүгүү тең салмакта болушу керек", — деп белгиледи Карабаев.
Анын айтымында, каржы секторунун туруктуулугун камсыз кылуу үчүн заманбап коргонуу технологияларын киргизүү менен катар адистердин квалификациясын жогорулатуу дагы негизги багыттардын бири бойдон калууда.
