Автотетик ичине катылып бараткан 7 килограммдан ашык алтын кармалды
Өзбекстандын Мамлекеттик коопсуздук кызматынын жана Бажы комитетинин кызматкерлери ири көлөмдөгү алтынды контрабандалык жол менен алып өтүү аракетин токтотушканын Podrobno.uz басылмасы маалымдады.
Маалыматка ылайык, укук коргоо органдары Фергана облусунун 31 жаштагы тургунун "Дустлик" чек ара бекетине жакын жерден кармашкан. Анын сумкасын текшерүү учурунда инспекторлор үч даана металлдан жасалган автоунаа тетиктерин табышкан.
Тетиктерди кесип көргөндө, алардын ичинен алтын куймалары чыккан. Алынган металлдын жалпы салмагы 7 килограмм 784 граммды түзгөн. Алдын ала баалоо боюнча жүктүн базар баасы 12 миллиард 466 миллион сумдан ашат (болжол менен 91 миллион сом).
Тергөө иштеринин жүрүшүндө алтындын бул партиясы Ташкенттен жөнөтүлгөнү аныкталган. Контрабандачылар аны жүк ташуучу унаалардын айдоочулары аркылуу Кыргызстандагы алуучуга жеткирүүнү пландашкан.
Кармалган жаранга карата Өзбекстан Республикасынын Кылмыш-жаза кодексинин 182-беренеси ("Бажы мыйзамдарын бузуу") боюнча кылмыш иши козголду.
