Шаирбек Ташиев декларацияда көрсөтүлгөн 12 млрд 637 млн сом тууралуу билдирди

Жогорку Кеңештин депутаты Шаирбек Ташиев "Азаттык" радиосуна берген маегинде 2024-жылдагы кирешелер жана чыгашалар боюнча декларациясында көрсөтүлгөн 12 млрд 637 млн сом тууралуу пикирин билдирди.

Депутат белгилегендей, чындыгында ал мындай байлыкка ээ эмес, декларациядагы сумма актив катары көрсөтүлгөн гана.

"Декларацияда 12 млрд деп жазылган, бирок чындыгында мындай каражаттар менде жок. Бул жөн гана активдер. Кээ бирлер жазып, бул акчаны Кытайга мамлекеттик карызды төлөөгө колдонсо болот деп айта башташты. Мен бул теманы комментарий кылгым келген эмес, бирок талкуулар токтобой жаткандыктан айткым келди. Активдерди легалдаштыруу жөнүндө мыйзам 100 млн сомдон ашык активдерди легалдаштырганда 1 млн сом төлөөнү карайт. Ал эми мага кантип болсо 12 млрд жазылып калган. Балким кошумча нөлдөр кошулган. Ошондон улам 1 млн сом төлөшүм керек болду. Албетте, аз-аздан, бизде бар. Депутат боло электе мен ишкерлик менен алектенчүмүн. Азыр бизнес менен жакындарым, балдарым алектенет. Бирок мындай акчам жок", — деп айтты ал.

Ташиев ошондой эле миңдеген жарандар активдерин легалдаштырганын, ал маалымат декларанттын макулдугусуз жарыяланбашы керектигин белгиледи.

"Президент, мисалы, 20 млн долларды легалдаштырган. Бирок ал өзү айтып берген. Мен мындай уруксат бербегем, ошондуктан мамлекеттик органдар мындай маалыматты жарыялай алмак эмес. Бирок эмне үчүн мен жөнүндө гана маалымат чыкты, ал эми чоң бизнес, базарлар, соода борборлору, миллиарддаган долларларды легалдаштырган адамдар тууралуу маалымат жок? Бизде 2–3 үй, бир-эки машина бар, аны эле дароо көрсөтүштү. Мыйзамга ылайык, укук коргоо органдары бул активдерди текшерүүгө укугу жок. Эгер булактарын көрсөтүүнү талап кылышса, мен баарын көрсөтөм, жок нерсени кантип көрсөтөйүн?" — деди Ташиев.