МинКаб Финансы министрлигине 60 млрд сомдук мамлекеттик казына облигацияларын чыгарууну тапшырды
МинКаб 2026-жылдын 2-мартындагы №127-т тескемеси менен баалуу кагаздар рыногун өнүктүрүү, 2026-жылга республикалык бюджеттин киреше бөлүгүн көбөйтүү жана мамлекеттик банктардын финансылык туруктуулугун жогорулатуу боюнча чараларды бекитти.
Каржы министрлигине берилген тапшырмалар
Финансы министрлиги Жогорку Кеңештин профилдик комитети менен макулдашуу аркылуу:
- 2026-жылкы бюджеттин киреше бөлүгүн Улуттук банктын пайдасынан түшкөн 16 млрд 534 млн 736 миң 497,99 сомго көбөйтүү;
- "Айыл Банктын" уставдык капиталын көбөйтүү үчүн 60 млрд сом бөлүү;
- 15 жылдык мөөнөткө, 3% купондук чен менен, негизги суммасы мөөнөт соңунда бир жолку төлөм менен жабылуучу мамлекеттик казына облигацияларын сом менен чыгаруу жана жайгаштыруу аркылуу 60 млрд сом тартуу;
- мамлекеттик баалуу кагаздарды чыгаруудан түшкөн каражаттын 35 млрд сомун Мамалекеттик ипотекалык компаниянын уставдык капиталын көбөйтүүгө багыттоо;
- мамлекеттик баалуу кагаздар боюнча карызды мамлекеттик ички карызга кошуп, тиешелүү өзгөртүүлөрдү 2026-жылкы республикалык бюджет жана 2027–2028-жылдарга пландалган мезгил боюнча мыйзамга киргизүү.
Кошумча чаралар
"Айыл Банкка" 60 млрд сомдук мамлекеттик баалуу кагаздарды сатып алуу жана 15 жыл ичинде жыл сайын таза кирешени көбөйтүп, андан түшкөн дивиденддерди толугу менен республикалык бюджетке которуп туруу сунушталды.
Мамлекеттик мүлктү башкаруу боюнча мамлекеттик агенттигине "Айыл Банктын" уставдык капиталын көбөйтүүнү камсыз кылуу жана кирешени бөлүштүрүүдө тескеменин талаптарын жетекчиликке алуу тапшырылды.
