Нарын облусунда 104 гектар жер мыйзамсыз ижарага берилген
Нарын облусунда 104 гектар токой жерин мыйзамсыз ижарага берүү фактысы аныкталганын Башкы прокуратура билдирди.
Маалыматка ылайык, мыйзам бузуу Жумгал районундагы токой чарбасынын ишин текшерүү учурунда аныкталган. Текшерүүнүн жыйынтыгында райондук токой чарбасынын кызмат адамдары 2019–2024-жылдары жер тилкелерин ижарага берүү боюнча формалдуу түрдө конкурстарды өткөрүп, бирок иш жүзүндө жасалма протоколдорду түзүшкөнү белгилүү болгон.
Ушул документтердин негизинде 49 жаранга токой фондунун жерлери 49 жылга ижарага берилген. Жалпы ижарага берилген жердин аянты 104,19 гектарды түзгөн.
Прокуратуранын маалыматына караганда, жооптуу кызматкерлер кызматтык абалынан кыянаттык менен пайдаланып, өздөрүнө же башка адамдарга пайда табуу максатында мыйзамсыз аракеттерди жасашкан.
Бул факт боюнча Кылмыш-жаза кодексинин 346-беренеси (Кызматтык жасалмачылык) боюнча кылмыш иши козголду.
