Кыргызстан менен Азербайжан парламенттер аралык кызматташууну кеңейтет
14-июлда Жогорку Кеңештин төрагасынын орун басары Болот Ибрагимов Азербайжан Республикасынын Кыргызстандагы Атайын жана ыйгарым укуктуу элчиси Латиф Сейфаддин оглу Гандилов менен жолугушуу өткөрдү. Бул тууралуу Жогорку Кеңештин Басма сөз кызматынан билдиришти.
Маалыматына ылайык, жолугушууда Кыргызстан менен Азербайжандын ортосундагы кызматташтыкты, анын ичинде парламенттер аралык байланыштарды мындан ары өнүктүрүү маселелери каралды.
Болот Ибрагимов эки өлкөнүн ортосундагы тарыхый, маданий жана руханий байланышка негизделген достук мамилелерди чыңдоонун маанилүүлүгүн белгилеп, депутаттык достук топторунун ишин активдештирүү, өз ара сапарларды уюштуруу жана тармактык комитеттердин кызматташуусун кеңейтүү зарылдыгын айтты.
Ошондой эле ал Түрк мамлекеттеринин Парламенттик ассамблеясынын алкагындагы өнөктөштүк парламенттер аралык диалогду жана саясий, экономикалык, гуманитардык байланыштарды бекемдөөдө маанилүү роль ойной турганын белгиледи.
Өз кезегинде элчи Латиф Сейфаддин оглу Гандилов Азербайжан Кыргызстан менен бардык багыттар боюнча кызматташууну, анын ичинде парламенттер аралык алакаларды өнүктүрүүгө кызыкдар экенин билдирди.
Мындан тышкары, элчи Азербайжан Республикасынын Милли Межлисинин төрайымы Сахиба Гафарованын Парламенттер аралык союздун президенти кызматына талапкерлиги көрсөтүлгөнү тууралуу маалымат берди.
