Жогорку Кеңештин комитети БШКнын ар жылдык баяндамасын укту
Жогорку Кеңештин Конституциялык мыйзамдар, мамлекеттик түзүлүш, жергиликтүү өз алдынча башкаруу жана Жогорку Кеңештин Регламенти боюнча комитети бүгүн, 2025-жылга карата КРнын Шайлоо жана референдум өткөрүү боюнча борбордук комиссиясынын ар жылдык баяндамасын укту.
Маалымат менен КРнын Шайлоо жана референдум өткөрүү боюнча борбордук комиссиясынын төрагасы Тынчтык Шайназаров тааныштырды.
Талкуу маалында депутат Дастан Бекешев буга чейинки парламенттик шайлоолордо аныкталган бир катар көйгөйлөргө токтолуп, анын ичинен талапкерлердин шайлоо фонддоруна ыктыярдуу кайрымдуулуктарды жүргүзүү үчүн QR-коддордун иштебегени тууралуу маселеге көңүл бурду. Ошондой эле майыптыгы бар адамдардын шайлоо участкаларынан тышкары добуш берүү тартиби тууралуу кеп кылган эл өкүлү мындай добуш берүүнү шайлоонун алдында эмес, шайлоо күнү өткөрүүнү сунуштады.
Депутат Болот Ибрагимов добуштарды сатып алуу фактылары, алардын алдын алуу жана бөгөт коюу боюнча көрүлгөн чараларга токтолду. Депутат Венера Салямова шайлоочулардын шайлоого катышуусун жогорулатуу боюнча маселе көтөрдү.
Ал эми комитет төрайымы Гульнара Акимбаева дагы майыптыгы бар адамдардын шайлоого катышуусун камсыздоонун маанилүүлүгүн белгилеп, алардын шайлоо укуктарын толук ишке ашыруу үчүн бардык шарттарды түзүү зарылдыгын билдирди.
Жыйынтыгында комитет мүчөлөрү БШК төрагасынын баяндамасын эске алды.
