Сентябрда Кыргызстандын ИДПсы 7.2%га өстү - «Кумтөрсүз» 4.9%
Үстүбүздөгү жылдын январь-сентябрь айларында Ички дүң продукт (ИДП) алдын ала баалоо боюнча 597 млрд сомду түздү жана 2021-жылдын ушул мезгилине салыштырмалуу 7.2%га жогорулады. Бул тууралуу Улутстатком билдирди.
«Кумтөр» кен казуу ишканаларын эсепке албаганда, үстүбүздөгү жылдын январь-сентябрь айларында ИДПнын көлөмү 555 млрд сомду түздү жана 4.9%га жогорулады.
Өнөр жай
Өнөр жай продукцияларынын көлөмү 2022-жылдын январь-сентябрь айларында 299 млрд сомду түздү жана өткөн жылдын январь-сентябрь айларына салыштырмалуу 16.6%га жогорулады, буга себеп негизги металлдардын өндүрүлүшү (37.9%), жыгач жана кагаз буюмдары, полиграфиялык ишмердүүлүктүн (28.2%), мунай заттардын (13.1%), тамак-аш продуктулары (суусундуктар менен) жана тамеки заттарынын (12.1%), текстиль өндүрүшүндө, кийим жана бут кийим, тери жана териден жасалган буюмдардын өндүрүшүндө (5%) ошондой эле пайдалуу кендерди казып алуунун (8.7%) өсүшү таасирин тийгизди.
Статистикалык маалыматтарга таянсак, курулуш, айыл чарба, дүң жана чекене соода тармактарында оң тенденциялар байкалган, алардын көлөмү курулушта – 4.3%га, айыл чарбасында – 6.5%, дүң жана чекене соодада – 7.2%га жогорулады.
Баалардын өсүшү
Үстүбүздөгү жылдын январь-сентябрында (өткөн жылдын декабрына салыштырмалуу) керектөө бааларынын жана тарифтердин өсүшү жалпысынан республика боюнча 10.6%ды түздү. Муну менен бирге алкоголдук ичимдиктерге жана тамекиге болгон баалар 17%га, тамак-аш азыктарына жана алкоголсуз суусундуктарга болгон баа 12.4%га, азык-түлүк эмес товарларга баалар 7.6%га, калкка көрсөтүлүүчү кызматтардын тарифтери 6.6%га өстү.
Сооданын көлөмү
КРнын товарларынын тышкы жана өз ара соодасынын көлөмү 2022-жылдын январь-август айларында 7.2 млрд АКШ долларды түздү жана 2021-жылдын январь-августуна салыштырмалуу 36.4%га көбөйдү, муну менен бирге экспорттук жөнөтүүлөр 36%га азайса, ал эми импорттук келип түшүүлөр тескеринче 1.8 эсе жогорулады.
КРнын ЕАЭБ мүчө мамлекеттери менен өз ара соода көлөмү 2022-жылдын январь-августунда 2.8 млрд АКШ долларын түздү жана 2021-жылдын январь-августуна салыштырганда 33.8%га өстү. Муну менен бирге экспорттук жөнөтүүлөр 1.5 эсеге, импорттук келип түшүүлөр 27.6%га жогоруланган.
Республиканын ЕАЭБ мүчө мамлекеттери менен болгон өз ара соодасынын эң чоң үлүшү ушул жылдын январь-август айларында Россияга (70.6%) жана Казакстанга (27.2%) туура келди.
