Тогуз айда мамлекеттик бюджеттин кирешелеринин жалпы көлөмү 211.4 млрд сомду түздү
2022-жылдын январь-сентябрь айларында мамлекеттик бюджеттин кирешелеринин жалпы көлөмү 211.4 млрд сомду түздү. Өткөн жылдын тийиштүү мезгилине салыштырмалуу бюджеттин жалпы кирешелери 45.5%га же 66.1 млрд сомго өскөн. Бул тууралуу Финансы министрлиги билдирди.
Маалыматка таянсак, салыктык кирешелердин көлөмү каралган мезгилде 163.4 млрд сомду түзгөн. Өткөн жылдын тийиштүү мезгилине салыштырмалуу салыктык кирешелер 56 млрд сомго же 52%га өскөн.
Ал эми Бажы кызматы тарабынан администрацияланган салыктык кирешелери 52.9 млрд сомду түзгөн. Ɵткөн жылдын тийиштүү деңгээлине салыштырмалуу бажылык төлөмдөрдүн жана салыктардын түшүүлөрү 62.3 %га же 20.3 млрд сомго өскөн.
Ошондой эле Салык кызматы тарабынан администрацияланган салыктык кирешелери 110.5 млрд сомду түзгөн. Өткөн жылдын тийиштүү мезгилине салыштырмалуу салыктык кирешелери 47.7%га же 35.7 млрд сомго өскөн.
Мамлекеттик бюджеттин салыктык эмес түшүүлөрү каралган мезгилде 37.7 млрд сомду түзгөн. Өткөн жылдын тийиштүү деңгээлине салыштырмалуу жыйымдар 5.9 млрд сомго же 18.6%га өскөн.
Расмий гранттардын түшүүсү 10.3 млрд сомду түзгөн. Өткөн жылдын тиешелүү мезгилине салыштырмалуу гранттардын түшүүлөрү 4.2 млрд. сомго көбөйгөн.
