Салык кызматы белгиленген планды 236 млн сомго ашык аткарды
Ушул жылдын тогуз айында 111 млрд 755.4 млн сом салык жана төлөмдөр чогултулган. Белгиленген план 236.8 млн сомго ашык аткарылган жана бул өткөн жылдын ушул мезгилине салыштырмалуу салыктар 35 млрд 906.6 млн сомго көп жыйналган (өсүү темпи 147.3%).
Мындай маалыматты Мамлекеттик салык кызматынын төрагасы Алтынбек Абдувапов министрлер кабинетинин төрагасы Акылбек Жапаров Финансы министрлигине караштуу МСКда өткөргөн жыйында билдирди.
Абдувапов белгилегендей, үстүбүздөгү жылдын 9 айында 148 млрд сомдон ашык салык жана камсыздандыруу төгүмдөрү чогултулган.
«2022-жылдын январь-сентябрь айларында салык кызматы тарабынан салыктар жана камсыздандыруу төгүмдөрү түрүндө 148 млрд 125 млн сом жыйналды, бул өткөн жылдын көрсөткүчтөрүнө салыштырмалуу 44.3 млрд сомго көп», – деди Салык кызматынын башчысы.
Жыйындын жүрүшүндө Акылбек Жапаров белгиленген салык чогултуу планы толук көлөмдө аткарылышы керектигин белгиледи.
«Электрондук эсеп-фактураларга толугу менен өтмөйүнчө, товарлардын кыймылын эсепке алуу кыйынга турат. Бирдиктүү салык төлөм картасы, «Салык төлөөчүнүн кабинети» сыяктуу долбоорлорду толуктап иштеп чыгып, ишке киргизүү керек. Контрабанда тууралуу унутпаңыздар, планды кыйналбастан аткаруунун бирден-бир жолу контрабанданы толугу менен токтотуу», – деди минкабдын башчысы.
Кеңешменин жыйынтыгында Жапаров бир катар тапшырмаларды берип, 2023-жылы консолидацияланган бюджеттин көлөмүн 500 млрд сом өлчөмүндө бекитүү пландалып жатканын белгиледи.
Буга чейин Economist.kg кабарлагандай, Мамлекеттик салык кызматына 2022-жылы 155.6 млрд сом салыктарды жана 41.7 млрд сом камсыздандыруу төгүмдөрүн чогултуу боюнча тапшырма коюлган.
