Банктардын кредиттик портфелинде жыл башынан бери доллардын көлөмү 12%га кыскарды

Банктардын кредиттик портфели 2022-жылдын сентябрь айынын аягында 194 млрд сомду түздү. Бул тууралуу министрлер кабинетинин төрагасы Акылбек Жапаров Жогорку Кеңештин жыйынында билдирди.

Анын айтымында, 2022-жылдын он айынын жыйынтыгы боюнча ИДПнын өсүүсү 7%ды түзгөн жана экономикада дедолларизация уланууда.

“Банктардын кредиттик портфели сентябрдын аягында 194 млрд сомду түздү, жылдын башына салыштырмалуу 6.8%га көбөйдү. Анын ичинде кредиттик-портфелде сомдун сомдун көлөмү 149.8 млрд сомду, жылдын башына караганда 14.4%га жогорулады. Ал эми доллардын көлөмү 12.5%га кыскарды, дедолларизация экономикада уланып жатат”, – деди Жапаров.

Ошондой эле ал экономикада акча жүгүртүүнүн көлөмү ИДПга карата 47%ды түзгөнүн кошумчалады.

Эскерте кетсек, 24-ноябрдагы Жогорку Кеңештин жыйынында КРнын 2021-жыл үчүн республикалык бюджетинин аткарылышы жөнүндө отчет, “КРнын 2022-жылга республикалык бюджети жана 2023–2024-жылдарга болжолу жөнүндөгү” мыйзамга киргизилип жаткан өзгөртүүлөр жана “КРнын 2023-жылга республикалык бюджети жана 2024-2025-жылдарга пландык мезгили жөнүндөгү” мыйзамдын долбоору каралган.