Кыргызстандын ИДПсынын өсүү темпи жыл аягында басаңдайт – ЕӨБ
Евразия өнүктүрүү банкы үстүбүздөгү жылдын IV кварталында Кыргызстандын экономикасынын төмөндөөсүн болжолдоодо. Натыйжада, 2022-жылы КРнын ИДПсы 3.1% гана өсөт.
Евразия өнүктүрүү банкы (ЕӨБ) банк иштеген өлкөлөрдүн экономикасынын өнүгүүсүнүн такталган болжолун жарыялады. ЕӨБдүн талдоочулары 2022-жылы Кыргызстандын ИДПсы 3.1%га өсөт деп болжолдошууда. Май айындагы болжолдоолор менен салыштырганда, божомол көбүрөөк экономикалык өсүшкө карай жылганы байкалды.
Кайра карап чыгуу Россиянын ИДПсынын кыскарышы жана Казакстандын экономикасынын олуттуу өсүшү менен байланыштуу – эки өлкө Кыргызстандын негизги соода өнөктөштөрү. Маалыматта КРнын товарларына жана кызмат көрсөтүүлөрүнө чет элдик жарандардын суроо-талабынын күтүүсүз өсүшү да ИДПнын өсүшүнө түрткү болду деп айтылат.
ЕӨБ эксперттери алтын өндүрүү тармагын Кыргызстандын экономикасынын негизги кыймылдаткычы деп аташат. Үстүбүздөгү жылдын 9 айында негизги металлдарды өндүрүүнүн көлөмү 2021-жылдын январь-сентябрына салыштырмалуу дээрлик 38%га өскөн.
Ошол эле учурда ЕӨБ эксперттери 2022-жылдын төртүнчү чейрегинде Кыргызстандын экономикасынын өсүү темпи басаңдашы мүмкүн экенин жана ага алтын өндүрүүчүлөр да себеп болушу мүмкүн экендигин айтышууда.
“Жылдын аягында ИДПнын өсүшүнүн басаңдашы күтүлөт, бул негизинен Кумтөр кенинде алтындын бирдей эмес өндүрүшүнө байланыштуу. IV кварталда алтынды өндүрүү өткөн жылдын ушул эле мезгилиндеги жогорку көрсөткүчтөрдүн фонунда төмөндөйт. Алтынды өндүрүү боюнча божомолдор жогорку деңгээлдеги белгисиздикке кептелет”, – деп айтылат маалыматта.
