Өнөр жай өндүрүшү Кумтөрдүн эсебинен 14%га өстү
Кыргызстанда январь-ноябрь айларында өнөр жай өндүрүшүнүн көлөмү өткөн жылдын ушул мезгилине салыштырмалуу 14%га өсүп, 383 млрд 209 млн сомду түздү. Мындай маалыматты Улуттук статистикалык комитет билдирди.
Кумтөр кенин иштетүүнү эсепке албаганда, өнөр жай өндүрүшүнүн көлөмү 226.1 млрд сом деңгээлинде гана катталып, өсүү темпи 3.9%ды гана түзгөн.
Өнөр жай продукцияларынын көлөмү 2022-жылдын январь-ноябрында 383 млрд сомдон ашты.
Оң тенденция негизги металлдарды (+30%), жыгач жана кагаз буюмдарын өндүрүүнүн, полиграфиялык ишмердиктин (29.3%) эсебинен камсыздалды. Ал эми ага кошумча мунайзат (14.4%), тамак-аш жана тамеки азыктарын өндүрүүнүн (11.2%), текстиль өндүрүшүнүн, кийим жана бут кийим, булгаары жана булгаарыдан жасалган буюмдарды өндүрүүнүн (5.9%), ошондой эле пайдалуу кендерди казуунун (8.5%) көлөмүнүн өсүшүнүн эсебинен өткөн жылдын январь-ноябрына салыштырмалуу 14%га көбөйдү.
