Алтынды сатуунун төмөндөшүнөн улам, экспорт 23%га азайды

28-декабрда Экономика жана коммерция министри Данияр Амангелдиев министрлер кабинетинин отчеттук жыйынында өлкөнүн негизги экономикалык көрсөткүчтөрү боюнча баяндама жасады.

Амангелдиев КРнын тышкы жана өз ара соодасы 2021-жылдын ушул мезгилине салыштырмалуу 41%га көбөйгөнүн, анын ичинде импорттун көлөмү 76.4%га өскөнүн, ал эми экспорт 23.1%га азайганын билдирди.

“КРнын ЕАЭБ өлкөлөрү менен өз ара соодасы 3 823 млн долларды түзүп, 39.2%га өстү, анын ичинде, экспорт 1 261 млн долларды түздү (өсүү 1.9 эсе болду), импорт – 2 562 млн долларды түздү (22.9%га өскөн). 

КРнын экспортунун жалпы көлөмү алтындын экспортунун төмөндөшүнүн эсебинен кыскарган, алтынды эсепке албаганда экспорттун көлөмү дээрлик 1.7 эсеге көбөйүп, 1 860 млн долларды түздү”, – деди министр. 

Ошондой эле ал 2022-жылдын жыйынтыгы менен КРнын экономикасынын өнүгүүсү ЕАЭБ мамлекеттеринин арасында жогорку деңгээлде болуусу болжолдонуп жатканын белгиледи.