«Айыл Банк» жана «РСК Банк» дыйкандарга 2 млрд сомдон ашык кредит берди
Минкаб төрагасынын орун басары Бакыт Төрөбаев «Айыл Банк» жана «РСК Банк» мамлекеттик банктарында көчмө жыйын өткөрдү. Жолугушууларда негизинен «Айыл чарбасын каржылоо» жана «Агроөнөр жай комплексин насыялоо» долбоорлорунун алкагында жеңилдетилген кредиттерди берүү темалары талкууланды. Бул тууралуу өкмөттүн басма сөз кызматы билдирди.
Бакыт Төрөбаев белгилегендей, мамлекеттик банктар мамлекеттик саясатты алып барган банктар болушу керек.
«Түшкөн бюджеттик каражаттарды жеңилдетилген кредиттерге жөн эле бөлүштүрүп койбой, кредиттерди берүүдөн мурун терең талдоо жүргүзүү зарыл. Дыйканчылык жана мал чарбачылыгын өнүктүрүүгө берилген жеңилдетилген насыялардын маанисин калк чындап сезиши керек. Ошондо гана мамлекеттик колдоо натыйжалуу болот», — деди ал.
Белгилей кетсек, ушул жылдын башынан бери «Айыл Банк» «Айыл чарбасын каржылоо» долбоорунун алкагында 892 фермерге 4.2 млн сом, ал эми «Агроөнөр жай комплексин кредиттөө» долбоорунун алкагында 29 фермерге 133 млн сом кредит берген.
Жыл башынан бери «РСК Банк» «Айыл чарбасын каржылоо» долбоорунун алкагында 1025 фермерге 473 млн сом суммасында жана «Агроөнөр жай комплексин кредиттөө» долбоорунун алкагында 1374 фермерге 1.4 млрд сом өлчөмүндө жеңилдетилген кредиттерди берген.
Белгилей кетсек, кредиттер 6% менен 5 жылга чейин берилет.
Жыйында ошондой эле энергиянын кайра жаралуучу булактарын пайдалануу менен күн жана шамал электр станцияларын курууга жеңилдетилген насыяларды берүү, айыл чарба техникаларын жана коммуналдык кызматтар үчүн атайын техникаларды лизингге берүү маселелери каралды.
