Кыргызстанда чет элдик түз инвестициялар 22%га өстү
Министрлер Кабинетинин төрагасы Адылбек Касымалиев өкмөттүн аппараттык кеңешмесинде экономикадагы өсүштү сактап гана тим болбостон, аны күчөтүү зарылдыгын белгиледи.
МинКаб башчысы 2025-жылдын январь-сентябрь айларында мамлекеттик бюджеттин кирешеси 722 млрд 901 млн сомду түзгөнүн, план 103,4%га аткарылганын белгиледи. Мамлекеттик салык кызматынын салыктык кирешелери 211 млрд 971,9 млн сомду түзүп, план 104,5%га аткарылган. Ал эми Мамлекеттик бажы кызматы тарабынан 102 млрд 146,4 млн сом салыктык кирешелери чогултулуп, план 102,4%га аткарылган.
Касымалиев белгилегендей, дүйнөдө түз чет элдик инвестициялар 11%га кыскарганы менен, Кыргызстанда тескерисинче 22%га өсүп, 1 млрд доллардан ашкан. Инвестициялардын басымдуу бөлүгү Бишкек, Жалал-Абад, Талас жана Чүй облустарына туура келет.
Үстүбүздөгү жылдын биринчи жарым жылдыгынын жыйынтыгы боюнча түз чет элдик инвестициялардын көлөмү 562,7 млн АКШ долларын түзүп, өткөн жылдын ушул мезгилине салыштырмалуу 21,7%га көп болгон. Жылдын биринчи жарым жылдыгынын жыйынтыгы боюнча инвестициялардын негизги үлүшү Бишкек шаарына — 42,7%, Жалал-Абад — 14,2%, Талас —14,0% жана Чүй — 12,8% облустарына инвестиция үлүштөрү туура келген.
Өкмөт башчы аймактарда чакан жана орто бизнести өнүктүрүү, инвестицияны диверсификациялоо жана экономикадагы тең салмакты сактоо боюнча бир катар тапшырмаларды берди.
Анын маалыматына караганда, чакан жана орто ишкердиктин ИДПдагы үлүшү 47,3%га жетип, бул көрсөткүч өткөн жылга салыштырмалуу кыйла өскөн.
