Салыктык келишим боюнча сүйлөшүүлөр болот
6–9-октябрда Бишкек шаарында Кыргыз Республикасынын жана Япониянын делегацияларынын ортосундагы Киреше салыгына кош салык салууну болтурбоо, салык төлөөдөн баш тартуунун жана салык салуудан качуунун алдын алуу жөнүндө макулдашуунун талкууланышы күтүлүп жатат. Бул тууралуу КРнын Экономика жана коммерция министрлигинен кабарлашты.
Сүйлөшүүлөр эки өлкө ортосундагы өз ара кызматташтыкты өнүктүрүүдөгү маанилүү кадам болуп саналат. Белгилей кетсек, кош салык салуудан качуу боюнча эл аралык келишимдер улуттук экономикага чет өлкөлүк түз инвестицияларды тартуунун эффективдүү механизмдеринин бири катары каралат.
Келишимдин негизги милдеттери – бир мамлекеттин резидентин экинчи келишүүчү мамлекетте дискриминациялык салык салуудан коргоо, салыктан качуу же Келишимдин жоболорунан кыянаттык менен пайдаланууга жол бербөө, келишүүчү мамлекеттердин компетенттүү органдарынын ортосунда маалымат алмашууну камсыз кылуу болуп саналат.
