Караколдо 70 млн сомго Юстиция министрлигинин жаңы имараты курулууда

Ысык-Көл облусунун Каракол шаарында Юстиция министрлигинин жаңы имаратынын курулушу жүрүп жатат. Бул тууралуу Курулуш, архитектура жана турак жай-коммуналдык чарба министрлигинен билдиришти.

Маалыматка ылайык, курулуш иштери 2024-жылы башталган. Объекттин жалпы сметалык баасы 70 миллион сомду түзүп, каржылоо республикалык бюджеттен каралган.

Жаңы имарат үч кабаттуу болуп, заманбап шарттар менен жабдылмакчы. Анын жалпы аянты 950 чарчы метрди түзөт.

Курулуш-монтаждоо иштерин “ЭКАРАС-5” жоопкерчилиги чектелген коому аткарууда. Долбоор Турак жай-жарандык курулуш департаменти тарабынан көзөмөлдөнүп жатат.

Министрликтин маалыматына караганда, объект толугу менен бүткөрүлгөн соң Юстиция министрлигинин аймактык бөлүмдөрүнүн ишмердүүлүгүнө ыңгайлуу шарт түзүлүп, жарандарга көрсөтүлүүчү кызматтардын сапаты жогорулайт.