Кыргызстан менен Япония салык тармагында жаңы кызматташтыкка жетишти
6-9-октябрда Бишкекте Кыргыз Республикасы менен Япониянын расмий делегацияларынын ортосунда Киреше салыгына кош салык салууну болтурбоо жана салык төлөөдөн баш тартуунун жана салык салуудан качуунун алдын алуу жөнүндө макулдашуу долбоорун түзүү боюнча сүйлөшүүлөр болуп өттү. Бул тууралуу Экономика жана коммерция министрлигинен билдиришти.
Тараптар документтин жоболорун кеңири талкуулап, принципиалдуу макулдашууну кабыл алышты. Макулдашуу расмий түрдө эки тараптын ички процедуралары аяктагандан кийин кол коюлат.
Бул макулдашуу Кыргызстандын жана Япониянын ишкерлери үчүн эки жолу салык төлөөдөн кутулуу мүмкүнчүлүгүн берет, экономикалык кызматташтыкты бекемдөөгө жана инвестициялык климатты жакшыртууга өбөлгө түзөт.
Андан сырткары, документ салык төлөөдөн качуу, дискриминациялык салык салуу жана макулдашууну кыянат пайдалануу учурларын алдын алууга, ошондой эле эки өлкөнүн салык органдарынын ортосунда маалымат алмашууну чыңдоого багытталган.
Мындай эл аралык келишимдер Кыргызстандын экономикасына түз инвестицияларды тартууну жеңилдетет жана экономиканын туруктуу өнүгүүсүнө чоң салым кошот.
