Панфилов районунда 106,5 млн сомдук каржылык мыйзам бузуулар аныкталды

Эсептөө палатасы Чүй облусунун Панфилов районундагы 2024-жылга карата жергиликтүү бюджеттердин аткарылышын текшерип, 106,5 миллион сомдук каржылык мыйзам бузууларды аныктады. Бул тууралуу Ekonomist.kg сайты жазды.

Маалыматка ылайык, аудит жергиликтүү өз алдынча башкаруу органдарын, муниципалдык ишканаларды жана айрым мекемелерди камтыган. Текшерүүнүн жүрүшүндө мыйзам бузуу жана финансылык тартиптин сакталбашы боюнча олуттуу фактылар табылган.

Аныкталган 106,5 млн сомдук мыйзам бузуулардын ичинен 93,1 млн сом калыбына келтирилиши керек, ал эми 7,5 млн сом аудит маалында эле кайра бюджетке кайтарылган.

Аудит учурунда төмөнкүдөй бузуулар аныкталган:
– бюджеттик каражаттарды мыйзамсыз пайдалануу;
– курулуш иштеринин наркын негизсиз жогорулатуу;
– ченемден ашык чыгымдар;
– мүлктү эсепке алуу тартибинин бузулушу;
– отчёттук документтерди бурмалоо.

Айрыкча, эсепке алынбаган мүлккө байланышкан мыйзам бузуулардын көлөмү эле 85 миллион сомго жакынэкени белгиленди.

Текшерүүнүн материалдары Президенттин Чүй облусундагы ыйгарым укуктуу өкүлүнүн аппаратына жана Панфилов райондук мамлекеттик администрациясына жөнөтүлүп, тиешелүү органдарга мыйзам бузууларды жоюу боюнча план иштеп чыгуу тапшырмасы берилди.