Дүйнөлүк банк Кыргызстандын билим берүүсүнө 6,36 миллион доллар бөлдү
Дүйнөлүк банктын жана Эл аралык валюта фондунун 59-жылдык жыйынынын алкагында финансы министри Алмаз Бакетаев Дүйнөлүк банктын Европа жана Борбордук Азия региону боюнча вице-президенти Антонелла Бассани менен жолугушту. Бул тууралуу министрликтен билдиришти.
Жолугушууда тараптар Кыргызстан менен Дүйнөлүк банктын кызматташтыгынын негизги багыттарын талкуулап, мектепке чейинки билим берүүнүн сапатын жогорулатуу жана жеткиликтүүлүктү кеңейтүүгө багытталган “Келечек үчүн билим берүү” долбоорун ишке ашырууну макулдашты.
Жыйынтыгында долбоорго 6,36 миллион АКШ доллары өлчөмүндө каржылоо бөлүнүп, анын ичинен 4,36 миллион доллар кредит жана 2 миллион доллар грант каралган. Бул каражаттар бала бакчаларды оңдоого, жабдуулар менен камсыздоого жана мектепке чейинки билим берүүнүн камтуусун кеңейтүү максатында имараттарды оптималдаштырууга жумшалат.
Мындан сырткары, тараптар Эл аралык өнүктүрүү ассоциациясынын (МАР-21) ресурстарын бөлүштүрүү, бюджеттик кызматкерлердин эмгек акысын жакшыртуу, адам капиталын өнүктүрүү жана экономиканы санариптештирүү боюнча реформаларды илгерилетүү маселелерин талкуулашты.
Министр Алмаз Бакетаев социалдык-экономикалык реформаларды колдоосу үчүн Дүйнөлүк банкка ыраазычылык билдирип, Кыргыз Республикасы өнөктөштүктү мындан ары да бекемдөөгө даяр экенин белгиледи.
