«Альянс Алтын» тогуз айда рекорддук 10.5 млрд сом салык которду
«Альянс Алтын» ишканасы 2025-жылдын тогуз айында Кыргызстандын бюджетине 10.5 млрд сомдон ашык салык жана милдеттүү төлөмдөрдү которду – бул компаниянын тарыхындагы рекорддук көрсөткүч. Бул каражат пенсияларды, социалдык жөлөкпулдарды каржылоого, мектептерди, ооруканаларды, жолдорду курууга жумшалып жатканын компаниянын басма сөз кызматы билдирди.
Жерүй кенин иштетүү башталган 2015-жылдан бери компания бюджетке 34.8 млрд сомдон ашык каражат которуп, анын 26.4 млрд алтынды сатуудан түшкөн салыктар. Мамлекеттик салык кызматынын маалыматы боюнча 2024-жылы «Альянс Алтын» өлкөнүн эң ири салык төлөөчүлөрүнүн арасында экинчи орунду ээледи.
Салык төлөмдөрүнөн тышкары компания аймактарды өнүктүрүүгө активдүү инвестиция салууда. 2025-жылы Талас районун жана Шумкар-Уя айылын көрктөндүрүү үчүн 620 млн сомдон ашык каражат бөлүнгөн. Каражат жолдорду оңдоого, инфраструктураны өнүктүрүүгө жана жергиликтүү демилгелерди колдоого жумшалат.
Ишканада 867 адам эмгектенсе, алардын басымдуу бөлүгүн Талас облусунун тургундары түзөт. Компания жергиликтүү таланттарды өнүктүрүүгө, туруктуу жумуш орундарын түзүүгө жана кызматкерлерди окутууга умтулат.
