Дүйнөдө кеңири таркаган 17 критикалык минералдын 10у Кыргызстанда бар

Жаратылыш ресурстары, экология жана техникалык көзөмөл министрлиги Кыргызстандагы келечектүү сейрек кездешүүчү минералдар кендерин “Кен казуу тармагы боюнча диалог: инвестиция, ачыктык, өнүгүү” форумунда санады. 

Кыргыз геологиялык кызматынын директорунун орун басары Руслан Калилов критикалык минералдар чөйрөсүндөгү инвестициялык долбоорлор тууралуу маалымат берди. 

Анын айтымында, келечектүү тоо кендерине Кутессай II, Калесай, Кызыл-Омпол, Түндүк Акташ жана алюминий чыга турган Зардалек, Катранбашы кендери кирет. 

Эске салсак, 2024-жылы Эл аралык ишкерлик кеңеши Англиянын Boston Consulting Group консалтинг компаниясы Кыргызстандын Критикалык минералдар стратегиясынын долбоорун иштеп чыгууну баштаганын билдирген. Дүйнөлүк экономика үчүн критикалык минералдар тармагы өтө маанилүү ролду ойнойт.

Ошол себептен Еврокомиссия буга чейин 17си кеңири таркаган критикалык минералдардын 34 түрүн өзүнчө бөлгөн. Жаратылыш ресурстары  экология жана техникалык көзөмөл министрлигинин маалыматына таянсак, ошол 17 минералдардын 10 Кыргызстанда бар. Анын ичинен сурьма менен сымап өлкөдө абдан көп.