Нурдан Орунтаев: "Кыргызстан курулушчуларынын эмгек акысы Россияныкына теңелди"
Кыргызстан курулушчулары Россиядагыдай эле айлык алып жатышканын курулуш, архитектура жана турак жай-коммуналдык чарба министри Нурдан Орунтаев “Кабар” маалымат агенттигине берген маегинде билдирди.
Анын айтымында, өлкөнүн курулуш тармагында бүгүнкү күндө жумушчу күчү жетиштүү. Атайын жүргүзүлгөн саясаттын негизинде башка өлкөлөрдөн да жумушчулар тартылып жатат. Кытай, Индия жана Бангладештен келген жумушчулар көп.
“Эмгек акыга келсек, азыркы тапта курулуш тармагындагы айлык Россиядагыдай деңгээлге жетти. Алсак, Россия Федерациясынан кайтып келген биздин жумушчулар, ошол жактаналган айлык маяналарын бизде деле алып жатышат. Мигрант өз мекенинде, үй-бүлөсүнүн жанында иштеп, эч кандай коопсуздук коркунучуна кабылбайт. Мындан тышкары, жумушчулардын укуктарын коргоо боюнча атайын тартиптер жана мыйзамдар иштелип чыгып, алардын укуктары мыйзамдуу түрдө корголуп жатат”,-деп белгиледи министр.
Ал Кыргызстан буга чейин жумушчу экспорттогон өлкө болсо, азыр жумушчу күчүн импорттогон мамлекетке айланганын баса белгиледи.
