Күздүк буудай эгүү эмне үчүн жакшы?
Суу ресурстары, айыл чарба жана кайра иштетүү өнөр жайы министри Бакыт Төрөбаев бүгүн «Ала Тоо азыгы» фермердик чарбасына барып, талаа жумуштарынын жүрүшү менен таанышканын министрликтин маалыматына шилтеме кылуу менен “Кабар” маалымат агенттиги жазды.
Аталган иш-чарага айыл чарба өсүмдүктөрүн өнүктүрүү департаментинин башчысы Бакыт Мамбетов да катышып, агротехнологиялык процесстери жана үрөн тандоо ыкмалары талкууланды.
Жергиликтүү дыйкандардын айтымында, жерди туура тандоо жана топурактын курамын анализдөө түшүмдүүлүктүн негизги фактору болуп саналат. Макро жана микроэлементтерди аныктоо, жер семирткичтерди туура колдонуу өсүмдүктөрдүн сапаттуу өсүшүн камсыздайт.
Адистердин маалыматына караганда, күздүк себүүнүн өзгөчөлүгү — өсүмдүк төмөнкү температурада да өнүп, жаздык себүүгө салыштырмалуу жакшы түшүм берет.
Себилүүчү буудай кайрак жерлерге ылайыкташкан ата мекендик сорт жана анын үрөнүнүн тазалыгы 99% ды түзөт. Белгиленгендей, мамлекет тарабынан дыйкандарга биринчи репродукциядагы (С1 үлгүсүндөгү) үрөндөр берилип, ал сорт өндүрүштүк шарттарга ылайыктуу жана климаттык өзгөрүүлөргө туруктуу экени белгиленген.
