ИИМ башчысы Астанада эл аралык конференцияга катышууда
Казакстандын Астана шаарында киберкылмыштуулукка каршы күрөшүү маселелерине арналган эл аралык конференция өтүүдө. Бул тууралуу ИИМдин басма сөз кызматынан билдирди.
Маалым болгондой, иш-чарага 27 мамлекеттин өкүлдөрү катышууда.
КРнын ички иштер министри Улан Ниязбеков анда киберкылмыштуулук тынымсыз өзгөрүп, барган сайын татаал уюштуруучулук мүнөзгө ээ болуп жатканын белгиледи.
Тактап айтканда, жасалма жол менен даярдалган үндөр, тааныш адамдардын жана мекемелердин атынан жөнөтүлгөн жалган билдирүүлөр, ошондой эле ойдон чыгарылган инвестициялык сунуштар алдамчылыктын кеңири жайылган ыкмаларына айланып жатканын белгиледи.
Ушуга байланыштуу Улан Ниязбеков киберкылмыштуулукка каршы күрөшүүдө комплекстүү мамиленин зарылдыгын баса белгиледи.
Ошондой эле мындай кылмыштарга натыйжалуу каршы туруу үчүн эл аралык өнөктөштөр менен маалымат алмашууну өз убагында уюштуруу өзгөчө мааниге ээ экенин айтып өттү.
