Кыргызстан менен Россиянын финансы адистери бюджеттин кирешелерин болжолдоо ыкмаларын талкуулашты
КРнын Финансы министрлиги менен Россия Федерациясынын Финансы министрлигинин эки тараптуу кызматташуу программасынын алкагында “Кыргыз Республикасынын мамлекеттик бюджетинин кирешелерин болжолдоонун ыкмаларын өнүктүрүү” темасында онлайн-семинар болуп өттү. Бул тууралуу Финансы министрлигинен билдиришти.
Семинарга КРнын Финансы министрлигинин Мамлекеттик кирешелерди талдоо жана божомолдоо башкармалыгынын начальниги Алмазбек Тойчубаевич Кочкоров, Программанын эксперти, Россия Федерациясынын Финансы министрлигине караштуу Илимий-изилдөө финансылык институту (ИИФИ) Мамлекеттик кирешелерди божомолдоо жана талдоо багытынын жетекчиси, экономика илимдеринин кандидаты Сергей Сергеевич Судаков жана ИИФИнин башка өкүлдөрү катышты.
Иш-чаранын жүрүшүндө мамлекеттик бюджеттин кирешелерин болжолдоонун сапатын жогорулатуу маселелери талкууланып, 2030-жылга чейинки орто жана узак мөөнөттүү мезгилге карата киреше болжолун түзүүнүн заманбап ыкмалары сунушталды.
Ушул сыяктуу семинарларды өткөрүү КРнын Финансы министрлигинин адистеринин эксперттик потенциалын бекемдөөгө жана мамлекеттик бюджеттин кирешелерин талдоо жана болжолдоонун жаңы ыкмаларын өнүктүрүүгө чоң салым кошот.
