Кыргызстан инвестицияларды Туруктуу өнүктүрүүгө багыттайт
Финансы министрлиги БУУнун Өнүктүрүү программасынын (ПРООН) колдоосу менен Туруктуу өнүктүрүү максаттары (ТӨМ) боюнча мамлекеттик инвестициялар программасын маркировкалоо процессин аяктады. Тегерек столдо мамлекеттик инвестициялык долбоорлорду комплекстүү баалоонун жыйынтыктары талкууланды. Бул тууралуу Финансы министрлигинен билдиришти.
Демилге Өкмөттүн жана БУУӨПтүн Туруктуу өнүктүрүү максаттарын пландоо жана каржылоого интеграциялоо боюнча системалуу аракеттеринин алкагында жүргүзүлүп жатат. Баалоонун жыйынтыгы мамлекеттик инвестициялардын салымын көзөмөлдөө, бюджеттик процесстин ачыктыгын камсыз кылуу жана туруктуу өнүктүрүүнүн улуттук жана эл аралык алкактарын макулдашууга мүмкүнчүлүк берет.
Финансы министринин орун басары Нурбек Акжолов белгилегендей, бул иштер ресурстарды натыйжалуу колдонуу жана стратегияларды туруктуу аракеттерге айландыруу үчүн маанилүү. Ал эми БУУӨПтүн Кыргызстандагы туруктуу өкүлү Александра Соловьева мындай баалоо инвестициялык долбоорлорду тандоодон баштап алардын ТӨМгө салымын мониторингдөө системасын түзүүгө чейин практикалык инструменттерди берет деп билдирди.
Министрлик жана БУУӨП Кыргызстандын мамлекеттик финансыны башкаруу системасын жакшыртуу, институттук потенциалды бекемдөө жана туруктуу өнүктүрүү үчүн инновациялык чечимдерди киргизүү багытындагы иштерин улантат.
