Мамлекеттик ипотекалык компания Таласта 310 батирлүү турак жай салууда

Президент Садыр Жапаров бүгүн, Талас облусуна болгон иш сапарынын жүрүшүндө өрөөндү өнүктүрүү пландары менен таанышып, анын социалдык-экономикалык көрсөткүчтөрү жана жергиликтүү калктын жашоо сапатын жакшыртууга багытталган долбоорлордун ишке ашырылышы тууралуу маалымат алды.

Президенттин Талас облусундагы ыйгарым укуктуу өкүлү Эрмат Жумаев үстүбүздөгү жылы асфальт-бетон, темир-бетон жана таш майдалоочу заводдор курулганын билдирди. Ошондой эле, жакынкы жылдары төө буурчакты кайра иштетүүчү экспортко багытталган завод куруу пландаштырылып жаткандыгын айтты. Облустун инфраструктурасын жакшыртуу үчүн Кыргыз Республикасынын Турукташтыруу фондунан 1 млрд сом бөлүнгөн. Талас шаарында 28,5 км ички жолго асфальт төшөлүп, 54 км тротуар курулган. Суу алуучу жайдын жана көлөмү 2000 куб метр болгон резервуардын курулушу аяктоо алдында турат. Бул бүт шаарды сапаттуу ичүүчү суу менен камсыздоого мүмкүндүк берет.  

Ошондой эле Талас мамлекеттик университетинин беш кабаттуу кампусунун, 900 окуучуга ылайыкталган мектептин жана жети бала бакча имаратынын курулушу башталып, Мамлекеттик ипотекалык компания тарабынан 310 батирлүү турак жай комплексин куруу уланып жатканы маалым болду.